2024 жылғы қазан айының мерейгерлері

17 қазан

Августина Порфирьевна Шкурина

туғанына 95 жыл (1929-1989)

    Августина Порфирьевна Шкурина 1929 жылы 17 қазанда дүниеге келген. Үш жасында әкесіз қалды, екі ағасы майданда қаза тапты, соғыстан кейін көп ұзамай анасы да қайтыс болды. Мектепті тастап шыққан Августина алдымен колхозда, содан кейін Мәскеу құрылыс ұйымында жұмыс істеді. Комсомолдың қолдауымен ол Мәскеу құрылыс техникумына түсті. Оны бітіргеннен кейін құрылыста жұмыс істеді және бүкілодақтық сырттай инженерлік-құрылыс институтында оқыды.

1955 жылы тамызда мәскеулік комсомолдармен ССГОК және Рудный қаласының құрылысына келіп, жаңадан құрылған СРС трестіне қабылданды. Алдымен өндірістік, сосын монтаждау бөлімдерінде инженер болып жұмыс істей жүріп, жылдар бойы комсомол ұйымының хатшысы болып сайланды. Тәжірибелі басқарушы Дмитрий Григорьевич Оника оның адамдарға деген шынайы қамқорлығын байқап, оны өзінің тұрмыс және кадр жөніндегі орынбасары етіп тағайындады, бірақ іс жүзінде ол бұрынғысынша трестің комсомол жетекшісі болып қала берді. Рудныйдағы 30 жылдық еңбек және қоғамдық қызметінің алғашқы күндерінен бастап Августина Порфирьевна тресттің, комбинаттың және қаланың қалыптасуына қызмет етті. Оған еңбегі сіңген басшылар да, еңбекшілер ұжымдары да, партиялық және қоғамдық ұйымдар да құрмет көрсетті.

Кадрлық өсімге үміт артатын партия обкомы Августина Порфирьевна Шкуринаны Қазақстан КП ОК жанындағы жоғары партиялық мектепке жіберді. Осылайша ол өз білімінде партиялық және кеңестік қызметкер деңгейіне көтерілді. Ол бірнеше рет қалалық және облыстық партия, кеңес, кәсіподақ және комсомол ұйымдарының басшылық органдарына сайланды. 1972 жылы 19 шілдеде ол Рудный қалалық халық депутаттары кеңесінің атқарушы комитетінің төрағасы болып сайланды. Мемлекеттік қызметтегі жоғары лауазымында ол сол кезде облыстағы жалғыз әйел болатын.

Августина Порфирьевна Шкурина көптеген еңбек ерлігі мен даңқ белгілерімен, соның ішінде «Құрмет белгісі» орденімен марапатталған. 1989 жылы 9 ақпанда ұзақ аурудан кейін 60 жасында қайтыс болды.

1. «Главная комсомолка новостройки» [Мәтін] : [гл. из кн. И. Дьячкова «Из истории легендарного АО «ССГПО» об Августине Шкуриной] / ред. газ. ; фото из архива // Рудненский рабочий. – 2015. – 11 қыркүйек. – Б. 4. 
2. Дьячков, И. Деятели культуры – на новостройке [Текст] : [встречи первостроителей Рудного с прославленными деятелями культуры и искусства] / И. Дьячков // Магнетит. – 2006. – 10 ақпан. – Б. 5.
3. Дьячков, Иван. Творение чудо-поколения [Текст] : Избранные публикации о строительстве ССГОКа и г. Рудного и об их славных тружениках ; [первая женщина во главе Рудного] / И. Дьячков. – Костанай : Костанайский печатный двор, 2006. – Б. 422–427.
4. Они были первыми [Текст] / [ред. газ.]. – Рудненский рабочий. – 1998. – 29 қазан. – Б. 2.