Құлымбет Әулие Тәтібекұлы кесенесі

Арқалық қаласының маңында, Қайыңды ауылынан оңтүстікке қарай 7 шақырым жерде ХХ ғасырдың басында Құлымбет Әулие Тәтібекұлының кесенесі салынды. Ол Орталық Қазақстан сәулетінің дәстүрлі үлгісінде орындалған, шаршы пішіндегі порталдық-күмбезді құрылыстан тұрады.

Құлымбет Тәтібекұлы (1840 – 1913) – көрегенділік пен емдеу қасиетіне ие болған, сол үшін халықтың қадірі мен құрметіне бөленген әулие. Оның даңқы туған өлкесінен тыс жерлерге де тарады. Осы уақытқа дейін Құлымбет әулиенің жерленген жеріне көптеген науқастар мен зардап шеккендер аурудан құтылу үмітімен асығуда.